Refrein:
Carneval, doe Carneval, ich sjpich mich zoo op dich.
Dich kèn ich toch neit misse, want doe bes ei sjtök van mich.
Carneval, doe Carneval, ich sjpich mich zoo op dich.
Dich kèn ich toch neit misse, want doe bes ei sjtök van mich.

Dao is ei plaetsjke in oos landj, zoo löstig en zoo blie,
dao-aan höb veer oos hart verpandj, mit al zie laammaekerie.
Me hiltj dao zoo van lol en sjpas, door alle tieje haer.
Veer zeen van 't echte Zittisje ras, daoròm viere veer zoo gaer.

Mit Vastelaovend zeen de daag van kisj en sjpas en lol.
Es me de waorheid zègge maag, is 't plezeier pas vol.
Mer dit jaor in 't biezunjer wurd ei sjöpke drop gedaon,
òmdat oos gouw Marotte noe zös maol ellef jaor besjtaon.

Veer viere dit jaor wie 't heurt eine echte Carnaval,
zoo-wie dat vruiger is gebeurt, mit zittinge en bal.
De bein gesjmeert en dan drop oet, verkleid 't is nooit te bòntj.
Mit verkesblaoze of ein toet klink door Zitterd in 't ròntj.