Witste nog wie sjoën ‘t woar:
V'r voetbalde op d'r plei
V'r fiedsde noa de Brunsummerhei
Die Roeë Beëk mit dat zilverzand
'T woar bekans neëve de düer
Sjunder es 't sjoënste sjtrand

Wiitste nog wie sjoën ‘t woar:
Die sjitterend witte Oambusjwei
Doe op miene rugk op de sjlei
Vuur rulsde in dae sjnei
Doe worps sjneibôl en peëperde mich in
Mit veül gelach en veül behei

Mè doe, doe woësjte ouwer
En doe wools nit mieë mit
En ich dach, zoë wie zoë veül ouwesj
Miene leeve God, wat is dit?

Witste nog wie sjoën 't woar:
Doe koams toes mit dieng ieésjte vriendin
Dieng verleefdheed, dat prille begin
Dieng vrung woare alles vuur dich
Ich sjtong efkes boetesjpel
Dat woar nit zoë fijn vuur mich

Mè noe, noe biste ouwer
En waste dees, God deë ‘t wit
En ich bedink mich noe wer:
'T Is miene zoon, nit mie bezit
Mè soms dan dink ich aa vreuger
Aan miene pap en zieng zurge um mich
Mè heë goof mich al zie vertrouwe
En jong, dat geef ich ooch aan dich