Ich höb mien sjoonste klédje aan, ein hertje oppe naas
Ein pruuk mit lange vlechte en ein brilke zónger glaas
Den zeen ich dich dao sjtaon geverfde sjpruutjes oppe kin
Van dich en vastelaovend krieg ich weer goje zin

Refrein:
Want es ich zeen wie desse kleurs es ich dich in dien ouge kiek
En daonao wie de beste sjoenkels oppe maot van de meziek
Es se den zo mer oet 't nieks de allerleefste dinge zaes
den weit ich desse net wie ich 't weer opnuuj te pakke haes

Den gaon veer erm in erm door heel de sjtad van plein nao plein
Veer hosse en veer danse toet 't pien duit aan de bein
De schminck van dich op mien gezich confetti in de haor
Dit is wo ich van höb gedruimd vanaaf 't veurig Jaor.