As de kienjer mit sjlieje langs de helling aaf glije,
of gaon sjaatse op 't ies,
dan is de wintjer gekómme, haet hie intrek genómme,
en maak van Limburg ein wintjerparadies.

As de vlökskes weer valle en veer gaon mit zien alle,
lekker wanjele langs bos en langs randj,
jao, dan zaet de kalender, taege 't eind van December:
't Is weer Kersmis in 't Limburgse landj.

Van Eysde tot in Mook en van Venray tot in Baek,
ederein verheug zich op die allersjoonste waek.
't Is tied van bezinne, de kersboum sjteit euveral binne,
jao, van Wellerlooi tot in Mesjtreech.

As de sjterre weer blinke en de kersleedjes klinke.
Ich heur de klokke van wied en van zied.
En 't landj lik al waeke ónger ein sjneewitte daeke.
Jao, det is eine prachtige tied.

As de herders weer wachte in die dónkere nachte,
op 't wónjer det Kersmis hit,
geit 't koor rippetere, de famfaar musicere.
Jao, dan weit ich, gans Limburg duit mit.