Waat sjtaot geer dao te kieke mit uch glaeske in de handj?
Allei, bewaeg die veutjes, blief neet plekke aan dae wandj!
Hiej zeen de baere, de blauwgemötste Masterbaere.
Laot os noe maar gewaere, want veer drage toch os eige vaere!

Al oppe vriejdaagaovend, dan begint veer os 't sjpeel.
Biej Ton oppe biljaar, dao gaeve veer os hert en zeel.
Veer zeen de baere, de goodgemötste Masterbaere.
Mit meziek en get artieste boewe veer os eige piste.

Refrein:
Miense op 't Zjwartbrook en 't Sjtasieplein,
noe kom en zing mit os dit Masterbaere refrein.
Bewaeg maar mit die heupe, det is harsjtikke gaaf,
want euver inkele daag, dan mot det masker weer aaf!

Zaoterdaag en zondaag blieve veer allich neet toes.
Dan haaje veer mit teen man in os binnesjtedje hoes.
Det doon die baere, die oetgelaote Masterbaere.
Van al die vieze glazer beer höbbe veer de lippe aan't zjwaere!

Op maondaag trek de optoch en ouch hiej zeen veer d'r biej.
Vanaaf ein oer of nege sjtaon de miense in de riej.
Wo zeen de baere? Wo blieve toch die Masterbaere?
Weit neet of ze waal komme, want ze höbbe nieks meer te vertaere!

Dinsdaagmorge, Sirkus Willems, jonges jonges waat ein fees.
Kroepe oppe kneen noa binne, zeen nog lang neet oetgebees.
Jao, jao, die baere, die opgesjaote Masterbaere.
Wilt geer eindelik eur rös, dan mot geer os nao boete kaere!