Zek, wet géj auk wie enne sjeep is gemak ?
Zôn krak haet veer rajer en dao-op einen bak.
Van binne wat rômmel ônderein gekiep,
Daobéj enne motor en de hebs enne sjeep.

Refrein:
Sjeep, sjeep, sjeep, ge kint toch enne sjeep.
Ge wet waal, zôn dink wao ein blikske op hink,
en det as 't ried nao petroleum stink.
Sjeep, sjeep, sjeep, ge kint toch enne sjeep.
Bekiekste zôn kisje van achter en veur,
de zuks, maar de vinds gen deur.

De sjeep is de ker van den modernen tiëd.
Dae huërste al kômme, al is ze nog wiëd.
De sjeep is ein brouwsel van rubber en zink,
'n Dink, aste rechts aaf dreis, nao links aafzwink.

Den buurman van ôs, dae is gister gepiep.
Hae reej nao den hemel toe in enne sjeep.
Had in vruëger iëwe ein sjeepke bestaon,
waas Elias neet met ein kèrke gegaon.

Ik kin ein meid die haet met Pruuse gesjouwd,
is tot nog toe neet in de bajes gedouwd.
Wet géj waorum die meid ut um neet kniep ?
Die zit béj enne Canadees in de sjeep.

De sjeep kump oët 't land van Uncle Sam,
maar dames en hiëre, ik staak mien gezwam.
Got allemaol staon nôw en roop dan hiep, hiep,
hiep, hiep, hiep, hoera, en lang laeve de sjeep.