Onger bie ós in de sjtraot dao zit ze aan de roet,
en es d'r boete get gebeurt kump zie häör huuske oet.
Ze kiek nao links, ze kiek nao rechs en vaeg mer mit dae kaer,
want Roete Dam is neet benuujt meh wèt toch alles gaer.

Refrein:
Roete dam-dam-dam, wèt d'r van-van-van,
die zal 't dich ins zègke.
Want ze wèt-wèt-wèt, wie 't zit-zit-zit,
de hoofs nieks oet te lègke.
En es zich boete get bewaeg,
dan weurt weer gauw de sjtoep gevaeg.
Roete dam-dam-dam, wèt d'r van-van-van,
die zal 't dich ins zègke.

Onger bie ós in de sjtraot haet geine de gezèt,
omdat 'r via Roete Dam 't lètste nuujts al krit.
Ze lègk 't dich omsjtendig oet in woord en in mimiek.
Een bietje van de waorheid en een bietje aangediek.

Onger bie ós in de sjtraot wèt eine wat d'r sjpeelt.
Van good of sjlech en sjeif of rech haet zie een prima beeld.
Ich kin die Roete Dam neet good meh zeker is ein dink:
ich weit woróm dat ónger in de sjtraot de sjtoep zoa blink.