wenieë's doe bie nach en óntiej
inèns vuer mien duer zouws sjtaon
en doe vrógs mich óm get wermde
leet ich dich zieëker neet mieë weggaon
ich zouw oêre nao dich loêstere
en mich vrujje in die nach
want óndanks mien sjtil verlange
how ich dich toch noeëts verwach

dao zouw tiêd zin vuer get koffie
tösje moeëre werme sjtein
vuer get kalle en begriêpe
hart en druime woeërte ein
alle sjaemende koos vervleege
en de wal tösje ós in
zouw vertaere, aopebraeke
in sjpattend vuer fónk'lende zin

doeër de piên van zeute wieëmood
kruup 't blood woe 't neet kint gaon
en oêt druime wuert gebaore
wat in hartstóch kint besjtaon

laot de wind mer boête biêze
lato 't vreeze tót 't kraak
laot desnoeëds de luuj mer kalle
dao is nieks mieë wat ós raak
en de blinge vuer de rôete
sjleete boête al wat sjtuert
inkel wermde en verlange
is wat noê 't laeve inkluert
uever huëvels, werm en baevend
doeër de heite aom gesjtrieëld
uever waeg tot noê verbórge
doeër de fantesie besjpieëld