Hae:
Weej waere allebei ein jäörke alder.
Dich löps neet miër op schoon met hoëge hak.

Zeej:
Dich hebs de letsten tièd dien veut vuël kalder.
Waorum hebs dich dich neet ein kroèk gemak ?

Saame:
Schei noow maar oèt met det gestraevel,
want det kan nog altièd nao 't diamant.

Hae:
Ik weit nog good det ik dich toen kwaam haole.
naodet's dich met daen and're hads gedans.

Zeej:
Dich hads metein op slaag mien hert gestaole.
toen goof 't veur en vlam, weej hadde sjans.

Saame:
Dich waas mien lötje veur d'n iërste priès.
Wat zal 't fijn zien met dich in Pariès.

Refrein:
Wat is d'r in al die jaore aan ôs veurbeejgegaon.
Weej zien wat griès gewaore, maar det haet ôs niks gedaon.
Al waas d'r ouk wal ens ein traon, d'n hemel hadde weej op aerd.
Gezôndheid en dich good verstaon is 't allermeiste waerd.