Liedje oet de Echter Revue van 2005 'Ech Onger & Baove'

Dochter:
Hej ich kènne weite, weite waat se dachs
Waat se in deep in dien hert éch van mich vónjs
Gedachte die èns laefdjen,die hieël ónverwachs
Zeen bedolve, in ein kis óngergrónjs

Dochter:
Zote dien auge vol mit traone
Woort dien voes óm mich gebaldj
Niks te zeen, in dien auge
Hej ich mer mit dich gekaldj

Moeder:
Hej ich laote weite, waat ich van dich dach
Nemes is dich lever es dien eige kèndj
Hej ich biej tied van leave,Neet zoa lang gewach
'ch stuur dich mien gedachte wiej 't wejje vanne wèndj

Moeder:
Mien auge zote vol mit traone
Mien voeste dök óm dich gebaldj
Niks mieë zeen mit mien auge
Väöls te dök neet trukgekaldj

De moderbandj is dök te kort
dus zeuks se 't gevech
blènd väör ein oetgestaoke handj
ónbereikbaar, te wuud weg

Dochter:
Zote dien auge vol mit traone
Moeder:
Mien auge zote vol mit traone
Dochter:
Woort dien voes óm mich gebaldj
Moeder:
Mien voeste dök óm dich gebaldj
Dochter:
Niks te zeen, in dien auge
Moeder:
Niks mieë zeen, mit mien auge
Dochter:
Hej ich mer mit dich gekaldj
Moeder:
Väöls te dök neet trukgekaldj