Mie Limburg, mie laand, wat és ént gebòré.
Zé zien dich zoe sjtiekém toch aon 't versjòré.
D'n dòrpkés vérdwéjné es sjnie vuur dé zon.
Dé vraog stich soms aof wie dat allés begon.
Wat heb ich aon Limburg, wat heb ich aon daank,
wat heb ich aon dich zoondér broed op dé plaank ?
Wat heb ich aon Limburg, wat heb ich aon daank,
wat heb ich aon dich zoondér broed op dé plaank ?

D'n éné zèt weg en d'n aandéré blievé.
Wat kroomp és moot rech en zé blievé mér sjrievé.
Zoe koewm vuur neet wéjèr, zoe blievé vier sjtoewn.
D'n toed gét vérbie en wat wòrt nog gédoewn.
Meh mòrgé wòrt béjtér, dat zét m'n allang.
Meh mòrgé mak mich toch é bittéké bang.
Meh mòrgé wòrt béjtér, dat zét m'n allang.
Meh mòrgé mak mich toch é bittéké bang.

De lùj doen hùn wérk en zé blievé mér hoewpé.
Meh sjtrak wòrt aoch hér doer 'n chip oondérkroewpé.
Want groeté mésjinné doen 't werk vuur dé klaant,
en doer dat mésjin sjtoewn dé lùj aon dé kaant.
D'n tied zal waol lieré wie of 't zal goewn.
D'n tied zét òs aoch of vèr daan nog besjtoewn.
D'n tied zal waol lieré wie of 't zal goewn.
D'n tied zét òs aoch of vèr daan nog besjtoewn.