Ach veurwat zitte die aw Mestreechtenere
Altied zoe euver eus jäög te lamentere
Zouw ’t werkelek zoe erg mèt hun zien
Zouwe zie daan alles oet ’t oug verlere?
Ach zie leve noe in ’nnen aanderen tied
Al die remminge vaan vreuger zien ze kwiet
Nump ’t neet zoe zwoer ’t kom allemaal wel good
Want us jäög die heet toch ouch Mestreechter blood
Want us jäög die heet toch ouch Mestreechter blood

Iech höb gistere mèt bewoondering gekeke
Wie e keend ’n aajdsje heelp mèt euversteke
Wie ’nnen aandere häör heelp mèt häör kalbas
Heel veurziechteg um de eier neet te breke
En deen opgesjote jong mèt zienen hoond
Dee heer ins, es joonk in ‘nnen drekbak voont
En dee heer verzörg heet mèt blij gemood
Zeet, dat tuinde weer dat ech Mestreechter blood
Jao dat tuinde weer dat ech Mestreechter blood

Aw Mestreechtenere geer moot toch es kieke
Noa de jäög die heuren gooien wèl liet blieke
Ach, dao goon ers wel ins boete de sjräöm
Mèr d’n allergroetsten houp,  "Cést magnifique".
Zeet uuch aon wat eus Mestreechter jäög nog deit
Es ’t geit um hölp en sjariteit
Maak uuch maar neet oongerös 't kömp wel good
Mèt eus kinder en hun Mestreechter blood
Mèt eus kinder en hun Mestreechter blood