Mit de vastelaovend ging Charel nao de zaal,
dao bleek ôs Zöstere interantionaal
Hea trof dao twieë meadjes,
sjoan wie roazebleadjes
Ze wore neet van Zöstere, Zitterd of van Gööl.
’t wore twieë meadjes van euver de pööl.

Refrein:
Mit Marie en Sophie kenste danse
kenste sjanse - kom der bie
Mit Marie en Sophie kenste danse
kenste sjanse wie nog nie

Uigskes wie ’n kerstaanjel kieke Charel aan,
ze sjanse noe mit Charel, hae wos neet wo opaan
Hea koos zien keus neet make,
det höbste mit die snake
Hea kreeg dao raodj euërkes van en de naas ein beitje bleik,
det koom door Marie en Sophie oet Mezeik

In de haor twieë vlegte mit ‘ne vraanjel draan,
zuuste ze den danse is ’t net ein böntje vaan
Ei kleuërke op hun wengske,
ei mundje wie ein frengske
Om de nak ei plekske en bleumkes op hun kleid,
jao det is Marie en Sophie oet Mezeik

Mer de vastelaovend doerde mer drie daag,
dao woor niks versjproake, det loog h’m oppe maag
hea loog mer te haope,
koos ter neet van sjlaope
Ze wore neet van Zöstere, Zitterd of van Gööl,
’t wore twieë gaanje van euver de pööl.