Koele en kuulkes
1. In Eegelse ziën ich de Laura nog ligke
de koel die et Wormdaal mit sjlaam hat gevuld
en neëve deur loog nog heur zjwester, de Julia
die hooi doe et dörpke in koeldamp gehuld
2. Bej et plaetsjke Gelaen hauwste destieds de Maurits
d'r prins van de koele zoë sjoën neujerwets
et plaetsjke dat gong wie 'n waereldsjtad grujje
en de koel die verdween inne oerwoud van flats
Refrein:
Ich han ze gekant
al die koele en kuulkes
ich han doa gewirkt en gesjpild nog es jonk
woë zint ze gebliëve
mieng koele en kuulkes?
vuurgood noe vertrokke, terük in de gronk
3. Op de Sjpekkelzerhei woar de Willem-Sophia
d'r sjteeberg van deur loog bis wied op de Grach
deë sjtöbde, deë zjwaamde deë sjtonk en deë walmde
deë leures, dat rookste deë brand daag en nach
4. Inne broenkaoleveld loog de groëtmodder Emma
me sjprook ronkseröm doe nog zuuver Gebrooks
En auw kolonieje wie Treebeek en Passart
die zint nog gebouwd dao mit winst van d'r cokes
REFREIN; Ich han ze gekant, al die koele.... enz.
5. D'r Lange Jan en et Lies waore doe de symbole
van de Heëlesje koel die ON woëd geneumd
wat han ich doa deks miene nak sjtoa verrekke
en umhoëg kiekend sjtil van d'r hiëmel gedreumd
6. De twiëde ON-koel die vongste op Sjaasberg
die nomt me De Twië of 'de Koel van d'r Sjeet'
Heëlehei hauw De Drei, de sjtolz van de Gaoswei
en get wier loog De Veer, woë d'r Hekseberg sjteet
Refrein:
Ich han ze gekant, al die koele.... enz.
7. Op Terwinsele loog de auw Wilhelmina
de sjtaatskoel van 't dorp, dus dat hit huuj, D'r Sjtaat'
De Hendrik in Brunssum is rujjig gao sjloape
die weed noe bewaakt durch 'ne Afcent-soldaat
8. De eujdste, de kromste mar wiedoet de leefste
waor 't kuulke van Kirkroa, de „Hollandsje koel"
van iëlend versjliëte, verzakt in zieng riëte
mieng gow Domaniale, ich gèf dich ing moel
Refrein; Ich han ze gekant, al die koele.....enz.