Refrein:
Kamezuilke van opa
’t corset van tant Truuj
mit de sjteevele van Bertha
zeen ich oet wie nuuj
de bermuda van de pap
mam’s huidje oppe kop
krolsjpange in ’t haor
Vastelaovend wurd top.

Jeder mörge veur de kast: is de twiefel dao
Weit waal waat de mode is, jederein aapt nao
Wil get angesj es de rest, mer toch ouch weier neit
Keize, jummig, dat is waal lestigste dat besjteit
Es ’t Vastelaovend is, is dat gans veubie
Is de keuze vlot gemaak, laop ich sjoon derbie.

Mam wurd sjtapelgek van mich, dreejt soms helemaol door
Gister goang ich nog mit heur jeansboks d’r vandoor
In de winkel sjtaon ich soms, drie oer veur de rek
Pap dae geit al neit meer mit, ruip: “doe maaks mich gek”
Kèn d’r, echt waor, niks aan doon, keize is ech zjwaor
Mèr dat guldj zeer zeker neit drie daag in ’t jaor.

Is d’r dan gein oplossing, vruig geer uch dat aaf?
Nou die is d’r waal liek mich, en dat is gans gaaf:
Vastelaovend, gans ’t jaor, is de stress veurbie
Wae dat veur mich reigle kènt, maak mich richtig blie.