Liedje oet de Echter Revue van 1997 'Ech, wiej 't woor'

Es de loch begintj te kaoke, heiten damp oet alle laoke.
Esset rômmeldjt ôngerin.
Doe kèns de heite aom al veule, 't geit braoje 't geit smeule,
krig de koel ziene zin.

Refrein:
Kaspar, kaolewolf, koelgeis, zoon van mooder aerd.
Kaspar, kaolewolf, koelgeis … zoon van mooder aerd.

Es de inzinjeur 'm geit kniepe, es de angs om zich hear geit griepe,
es de angszweit vanne koempels zich vermengtj mit gruus en staof,
den wolse det se thoes woors (biej femilie, hoes en haof).
den wolse det se thoes woors (biej femilie, hoes en haof).

Es dae Kaspar dich kömp haole, v'rèk mer mit dien rottte kaole.
Esset rômmeldjt ôngerin.
Es de berg begintj te krake, kènse dich gereid gaon make,
krig de koel ziene zin.