èns waor ènnen'tiêd, doe laefde luuj
gans angesj wie de miensj van huuj
in harmonie mit de natuur
en zelde eine uueversjtuuer
ze trokke same op of aaf
vermenigvöldigde zich braaf
geinen' aristocratekwatsj
ze rolden' in d'r pratsj

howwe ze ós mer wild gelaote
zègk zelf, wat zin vier opgesjaote
mit al dae luxe zint v'r erm
oos keule hart wuuert neet mieë werm

ze hoofde doe neet nao 't wirk
en ouch neet 's zóndes nao de kirk
en geine dae de wètte loos
want geine dae ze laeze koos
't zoeëmesj leep doe jeeder bloeët
de zon verwermde klein en groeët
en waor 't 'sjnachs get koud en klaam
kroeëpste taege de werme vot va mam

ze woeënde in è baerehol
de baer sjlooge ze op de bölles
dat kraakde waal è bietje luuj
mer dae bóntjas dae waor nuuj
en baere goof 't doe nog zat
dat waor ouch nuuedig wètste dat
loogste zónger jas in d'r zoûw
verrèkdeste van de kou

gein auto's dus, ouch geine sjtank
vergief maakde de luuj neet krank
gein fiscus, gein belastingsjoût
gaê geld, dao woeërt ieërlik geklouwd
't goof doe nog gein sjeetgewaer
ze sjtèlde zich mit énne kuul te waer
ze slooge zich get in d'r nak
ein eine waor d'n erme kloeët

mit aete noome ze 't neet genoûw
ze baedelde neet biê de vrouw
ze leepe hél ouch zónger sjoon
en vónge zich ein diekke hoon
't kaoke waor neet zoeë-é gedeuns
ze plökde zich geweun get greuns
't vleisj dat oot me aan de knao
me vroot zich sjtiêf en lag zich dao

looge ze 't saoves ziej aan ziej
sjloog hun de kriebel in de priej
ze howwe gein bepirking doe
dao-in zoot 'm mesjiên de kloe
me kieëk neet woe is die va mich
wat gedaon moos waere woeërt verrich
mit ouwt of jónk of nónk of tant
zoeë heele ze de saort in sjtand

de miensj vervaelde zich doe neet
gein kaotsjpraeke en gein verdreet
ómdat de vrouw neet kiêne góng
gewuuen ómdat dat neet besjtóng
en zuug toch allewiel dae sjiên
me deit zoeë sjiek en kalt zoeë fiên
aafhenkelijk van nivo en sjtand
wat is toch mit ós aan de hand