In Arensgenhout liek 'n hièl klein caféke,
op d'n hook van de Mèswaeg en de Depesjtraot.
'Van Oppe' en 'Sjpaetjes' zin al jaore geweke,
meh dit is gebleve en 't kin dao gein kaod.
Es te binnekumps dinks te: 'haet d'n tied sjtilgesjtange?
gein verwerming, geine koffie, ouwerwèts meubilair',
meh toch zin v'r door Fiennie ummer gasvrie óntvange,
en ièrlik is ièrlik, v'r kómme d'r gaer.

Refrein:
Bis doe nóg gewaes bie Fiennie van Packbeer,
in de café, in 't zaelke, dao waor dèk get los.
Lèt op was te zaes euver Fiennie van Packbeer,
want door al die jaore is dat 'n sjtökske van ós.

Eed're zaoterdigaovend klinke kopere klanke,
van fanfare Sint-Clemens, ze galme nóg nao.
Veur die honderde kière wil v'r Fiennie bedanke,
want väöl is verangerd, meh 't thoeshónk bleef dao.
Mit Sint-Clemensfiès vreuger; me sjlachde 'n verke,
dat woort dan gedeild door fanfaar en donateusj.
En wat Fiennie waardeerde kós te altied waal merke;
mit de pries van 't pilske bleef 't mild veur de beusj.

't Is jaore geleje dat bie Fien woort gekeigeld,
van de café nao de zaal in, zoa leep toen de baan.
En och, menige werper is op heim aan gesjeigeld,
want 't voch van 't zjweite kaom op de barkruk weer draan.
Veur de buurt, de doevepiete, de majorettes van de drumband,
bie Fiennie waor plaats veur eder leefhöbberie.
Es 't knepkesbal óm waor en doe gedans houws veur vief cent,
klónk es de deur in 't sjlaot veel: 'goeienaovend en merci'.

Kiek 'n klein gruupke kaartesj, zit op zóndig 't sjmörges,
ze lieke te vechte veur edere sjlaag.
En de jónges van Lumpes die vergaete hun zörge
es ze efkes óntsjnappe aan de waan van d'n daag.
Dat veer romantisere, dat zult geer mesjien vinge,
eder feit weurt get sjoaner, gekleurd door d'n tied.
Meh laot ós mer gewaere, laot ós noe mer zinge,
zoa raak v'r die beelde van vreuger neet kwiet.