Ut woar um hoaf zieëve, ich leep durch de sjtroat,
houw sjtriet mit mieng vrouw, wat wor die mokkel koad.
Ich gong noa de wieëtsjaf en dach doa nieks bei.
Ich bin inne maan en veul mich richtig vrei ...
Dat is d'r wieëtsjafblues, ja, dat is d'r wieëtsjafblues ...

Ich zoot op ing kruk en besjtelled ee beer.
Dat don ich wal ins dukser en dat don ich richtig geer.
Ich kiek noa d'r wieët, mar hea keek och noa mich.
Hea zaag: 'Hee jong, ich kien nog wat geld van dich ...'
Dat is d'r wieëtsjafblues, ja, dat is d'r wieëtsjafblues ...

Ich dink: 'Doe sjtees op en lups ins noa de WC',
mar wie ich toen doa koam, doe dag ich: 'Ojee,
doe kins ja nit mieë mikke', wat how ich inne lol.
Ut loopet mich alles d'r neaver, want d'r bak, dea wor al vol ...
Dat is d'r wieëtsjafblues, ja, dat is d'r wieëtsjafblues ...

De boksepiep naat, zoeë gong ich doe eroet.
Ich dach: 'Doe mos truuk goa noa dieng eege boet'.
D'r sjluütel wor zjwoar, ut loak wor te kling.
Noe weet ich och woarum ich dat loak noeëts ving ...
Dat is d'r wieëtsjafblues, ja, dat is d'r wieëtsjafblues ...

Endlich woar ich binne en looput erop.
Ich keek doe in de ieskas, mar doa wor alles op.
Dan mar noa bed, dan han ich mieng rouw.
Mar och, ich wor ens vergeëte, doa looch in dat bed och mieng vrouw ...
Ich bin inne maan en veul mich richtig vrei ...
Dat is d'r wieëtsjafblues, ja, dat is d'r wieëtsjafblues ...