'ch weit nog d'n tiêd vuuer vier ós kinde
doe waors è maedje en ich waor eine jóng
wie veer apaart oos laeve nog verkinde
wie ós 't vuur van noê nog neet verbóng
mer op ènnen'daag volgde vier twieë dezelfde witte vlinder
gove v'r same 't antwoeërd op dezelfde vraog
't allein gaon dat woeërt doe gans flot minder
jao sins ich diene vuuernaam neume maog.

Doe kaom d'n tiêd dat vier ós baeter kinde
doe waors mien maedje en ich waor diene jóng
grujde nao-ein vier blujde en beminde
es ich vuuer dich mien leefdesleedje zóng
en jieëkeren'daag volgde vieër twieë dezelfde witte vlinder
gove v'r same 't antwoeërd op dezelfde vraog
vier woeërte sjtil en oos gekkigheid get minder
'ch bin bliej dat ich dich leefste neume maog

dao kaom d'n tiêd dat vier ós zoeë good kinde
dat vier gein oeër mieë kooste zónger-ein
woebiê d'n eine zich zoeë good aan d'n angere wènde
mit wieënig wuurd ós versjtónge déks zelfs gein
en jieëkeren'daag volgde vieër twieë dezelfde witte vlinder
gaeve vier nog 't zelfde antwoeërd op die vraog
och ich houd van dich väöl mieé al zègk ich 't minder
al druim ich mieë dae naam ich weit 't maog

en kump d'n tiêd dat eine van hiê mót wiêke
nao't anger land woe'n bloom gans angesj blujt
vertèl ze dao van oos leefde óngemujd
en op ènnen'daag volge v'r waer dezelfde witte vlinder
gaeve vier same 't antwoeërd op dezelfde vraog
es doe bie mich bis da zint mien angste minder
jao es ich diene vuuernaam neume maog