't waor aafgeloupe zoeëmer
doe zoot biê ós op 't daak
ein posdoêf die verdwaald waor
doe zag miene kleine sjnaak
hei pap zouw v'r ze voore
die haet zieëker hieël väöl doeësj
en ouch waal gans väöl hónger
dao ligk binne nog ein koeësj

vier lokde ze nao ónger
mit get water en get broeëd
oos jungske waor zoeë entoesias
dat zoog ich aan zien sjnoêt
hae zag: pap gangk ze vange
en da zaeste aan die doêf
dat ze nao sinterklaos mót vleege
ich höb vuuer häöm hie einen breef

dao-in höb ich gesjrieëve
wat ich zoeëgaer höbbe wil
dat wat vurrig jaor te duur waor
zoeë vertèlden 'r hieël sjtil
ich perbeerde oêt te lègke
wats doe wils is nogal duur
dat kint klaos neet betale
mer de jóng zag uueversjtuuer

dan pak ich miene sjpaarpot
och ich vóng'm toch zoeë leef
en doon mien eige tientje
biê 't liêske in dae breef
die nach höb ich neet gesjaope
vertieëderd doeër dat kind
en dach dat juus dizze sinterklaos
zoeë è jóngske 't meis bemint

wie ich häöm daags denao vertèlde
och, doe huulden't menke haos
dat ich die doêf gesjik how
mit dae breef nao sinterklaos
doe sjtraolden'r oêt zien uigskes
en mit zien ganse sjnoêt
en zag: och pap noe kómme
mien wunsjkes toch nog oêt