As ich al ein moer wil boewe, róntjelóm mich haer,
veur det de letste sjtein kump ligke, zegk ich, ich höb dich gaer,
zegk ich, ich höb dich gaer.

Heel zeker weite doon ich kiendj, ich höb gedaon waat kós.
De liene mit de voog gemaete, bie-ein geklop waat mós.
Ich höb veur ós ein deur geboewd, in 't midde van de moer.
Ich haop, as die ooit aope mót, veer neet zeen flink of sjtoer.

't Kan bes ooit gebeure kiendj, veer twee in ein gevech.
Ich zal probere dich te zegke, kom binne, deh's oprech.
Want boewe mós se same doon, 't geit ech neet allein.
Doe en ich, veer mótte same boewe, laog veur laog en sjtein veur sjtein.

As doe dan bie mich binne kumps, haaj ich dich aan mien ziej.
Dan legke veer de letste sjtein van zoväöl in ein riej.
Dae letste sjtein sjluut 't verbandj, ós boew-werk is compleet.
Waem wit of sjpies en sjtein good zeen, ich weit, ich weit 't neet.