In Catsop bèn ich gebaore, biej 't kèpelke op 't Einj.
Dat is jhèl lang geleeje, ich waor ein jhèl klein keindj.
Toen voore nog gein auto's, al ging nog tevoot.
Plasse waor nog pisse in de zeinkput op 't good.
In Aelse ginge veer nao sjwal, dat waor veur oos wiet weg.
Dao numde ze oos boere, wat waore die dao vreg.
Weurste auwer, dan wilste jhèl gauw oet dat laok,
neet väöl wier es Aelse, angesj raakste van de kaok.
Dao greujt dien eige gezin dan op, de maaks auch jhèl get mit.
Gelök en leid dat deilste, mèh dao is get wo ich mit zit.

Refrein:
Want kom ich weer in Catsop, biej 't kèpelke aan 't Eindj,
dan kump 't weer nao baove, 't geveul wat mich hiej beindj.
Dan mis ich weer die boereloch, de gezelligheid van toen,
wo ver vossejage deege, op d'n Dreesj de jètste poen.

En es ich weer door Catsop laup, op de Knup of op de Hoos,
dan deink ich: sjtômme os, dats dich hiej noe neet woons,
wo pap en mam gebaore zin, wo 't ouwershoes nog sjteit.
Eine kilomaeter weg, mèh 't deit nog ummer leid.
Väöl luuj die zin oet Catsop weg, verhoes of nao't paradies,
väöl vraeme zin gekomme en väöl luuj oud en gries.
Wo zin ze toch gebleve, de sjwalvrunj van dae tied,
of höbbe die, sjus wie ich, al jaore grwatte sjpiet?

Refrein:
Want kom ich weer in Catsop, biej 't kèpelke aan 't Eindj,
dan kump 't weer nao baove, 't geveul wat mich hiej beindj.
Dan mis ich weer die boereloch, de gezelligheid van toen,
wo ver vossejage deege, op d'n Dreesj de jètste poen,
wo ver vossejage deege, op d'n Dreesj de jètste poen.
Messchien kump ein bejaardehoes, op d'n Wakkel of de Knup.
Dan bedeink ich mich gein ein moment en kom direk weer truk.