Boe maag miene Christiaon zien,
heer wouw 't land verlaote.
Iech kin neet in de maonesjien
met häöm mie stoon te praote.
En zeen iech noe de maon dao aon,
daan dink iech aon m'ne Christiaon.
En zeen iech noe de maon dao aon,
daan dink iech aon m'ne Christiaon.

Iech waor veur häöm z'n leefste prij,
heer plaogde miech zoe geere.
Heer gaof m'ch dóffe in m'n zij,
dat neump heer karessere.
En zeen iech noe de vrijers aon,
daan dink ich aon m'ne Christiaon.
En zeen iech noe de vrijers aon,
daan dink ich aon m'ne Christiaon.

En waor 't speul, daan dansde heer
mèt miech, dat waore kenskes.
Me zaog zien flikkers mèt plezeer
heer kin de sjoenste denskes.
En zeen iech noe 't danse aon,
daan dink iech aon m'ne Christiaon.
En zeen iech noe 't danse aon,
daan dink iech aon m'ne Christiaon.

Heer aot z'ch op eus lèste broonk
zoe stief aon vlaoj en mikke.
Iech zaot deneve opgeproonk
mèt blouw en raose strikke
En zeen iech noe die strikke aon,
daan dink iech aon m'ne Christiaon.
En zeen iech noe die strikke aon,
daan dink iech aon m'ne Christiaon.

Ins kump 'r toch nao hoes t'rök
m'nen hoop is neet verlore.
Daan bringk 'r miech weer 't aajd gelök.
dat maag daan blieve dore.
En zeen iech noe z'n hoes weer aon
daan dink iech aon m'ne Christiaon.
En zeen iech noe z'n hoes weer aon
daan dink iech aon m'ne Christiaon.