Daag Drieka, daag Koëba, daag Bertha, daag Billa,
dao gaon we dan weer haer.
Daag Kuëbes, daag Tinus, daag Hannes, daag Nilles,
weej zien alweer zoëvaer.
Weej hebbe de beinkes gesmaerd en we zien in ein biëstig gooje buuj.
Waat is det toch joeksig, de zuus eder jaor weer diezelfde boereluuj.

Refrein:
Weej gaon met de broelof mei, dao vinde weej ôzzen dreij.
Weej deje ôs boere-ploete aan, en now geit 't loos en now geit 't d'raan.
Want wae boerebroelof viert, dae buis en dae piert en zwiert.
Zoë wuurd minnig welske gedreid, met zô'n rônde boeremeid.

Weej kletste en zinge, weej walse en springe, weej bläöke van de lol.
Weej hebbe te aete, weej hebbe te drinke, ôs kallebeske vol.
Now dink gennen boer aan de kuuj en de kiepe en aan de verkes thoës.
En as 't gedaon is dan gaon weej vannach met de kiepker weer nao hoës.

En kriege weej hônger, dan waere ens efkes de mouwe opgestruip.
Dan kômme de flaaj en de plats op de taofel, en kaoje beej de huip.
Daonao gaon we aete, broen boëne of kappes of boeremoos met wors.
Daobeej dan ein keul pötje leech of dônker beer of halfum veur d'n dors.