Minse kwame, minse ginge, same baeje, same zinge.
Nao genuuj, nao de kepel van ôs leef vrouw.
En zoé minnigein bleef mooder altied trouw,
baejt hae noow nog aeve gaer.
Kranke luuj, gebraoke minse, smaekgebaeje, hertewinse.
Klein kepelke is ein plaats van leef en leid,
van verlange haop en dankbaarheid,
door alle jaore haer.

Refrein:
Ave Maria, Ave Maria.
Auk in veurspood en gelök of in groet verdreet.
Mooder leef, waat auk gebeurt, verlaot mich neet.

En ein bruudje offert bliej zien broedsboeket,
nao ut baeje van ein ierlik dankgebed, geit ut weg de toekoms in.
Kleinde kinder met waat blumkes, ingehalde fluusterstumkes,
laupe smiespelend naevenein wies gans veuraan.
Wae van eur staek noow verdöld ut kerske aan ?
Ut kleinste krieg ziene zin.